Genesis 5

Kusukela ku-Adamu Kusiya kuNowa

1Lo ngumlando olotshiweyo ngosendo luka-Adamu. Kwathi uNkulunkulu edala umuntu wamenza ngomfuziselo kaNkulunkulu.

2Wabadala baba ngowesilisa lowesifazana wababusisa. Kwathi sebedaliwe wababiza ngokuthi “abantu.”

3Kwathi u-Adamu esephile iminyaka elikhulu lamatshumi amathathu wathola indodana eyafana laye xathu; wayibiza ngokuthi nguSethi. 4USethi esezelwe u-Adamu waphila iminyaka engamakhulu aficamibili, njalo wayelamanye amadodana lamadodakazi.

5Isiyonke iminyaka ka-Adamu yayingamakhulu aficamunye lamatshumi amathathu, yikho wasesifa.

6Kwathi uSethi esephile iminyaka elikhulu lanhlanu waba nguyise ka-Enoshi. 7Ngemva kokuzala u-Enoshi uSethi waphila iminyaka engamakhulu aficamibili lesikhombisa, njalo wayelamanye amadodana lamadodakazi.

8Isiyonke, uSethi waphila iminyaka engamakhulu aficamunye letshumi lambili, wasesifa.

9Kwathi u-Enoshi esephile iminyaka engamatshumi aficamunye wazala uKhenani. 10Ngemva kokuzala uKhenani u-Enoshi waphila iminyaka engamakhulu aficamibili letshumi lanhlanu, njalo elamanye amadodana lamadodakazi.

11Isiyonke, u-Enoshi waphila iminyaka engamakhulu aficamunye lanhlanu, wasesifa.

12Kwathi uKhenani esephile iminyaka engamatshumi ayisikhombisa wazala uMahalaleli.

13Ngemva kokuba esezele uMahalaleli, uKhenani waphila iminyaka engamakhulu aficamibili lamatshumi amane, elamanye amadodana lamadodakazi. 14Isiyonke, uKhenani waphila iminyaka engamakhulu aficamunye letshumi, wasesifa.

15Kwathi uMahalaleli esephile iminyaka engamatshumi ayisithupha lanhlanu, wazala uJaredi. 16Ngemva kokuzala kwakhe uJaredi, uMahalaleli waphila iminyaka engamakhulu aficamibili lamatshumi amathathu, njalo elamanye amadodana lamadodakazi.

17Isiyonke, uMahalaleli waphila okweminyaka engamakhulu aficamibili lamatshumi aficamunye lanhlanu, wasesifa.

18UJaredi esephile iminyaka elikhulu lamatshumi ayisithupha lambili, wazala u-Enoki. 19Ngemva kokuzala kwakhe u-Enoki uJaredi waphila okweminyaka engamakhulu aficamibili, njalo wayelamanye amadodana lamadodakazi. 20Isiyonke, uJaredi waphila iminyaka engamakhulu aficamunye lamatshumi ayisithupha lambili, wasesifa.

21Kwathi u-Enoki esephile iminyaka engamatshumi ayisithupha lanhlanu, wazala uMethusela. 22Ngemva kokuzala uMethusela u-Enoki wahamba loNkulunkulu okweminyaka engamakhulu amathathu, njalo waba lamanye amadodana lamadodakazi.

23Isiyonke, u-Enoki waphila iminyaka engamakhulu amathathu lamatshumi ayisithupha lanhlanu. 24U-Enoki wahamba loNkulunkulu; yikho wasuka wathi nya, ngoba uNkulunkulu wamsusa.

25Kwathi uMethusela esephile okweminyaka elikhulu lamatshumi aficamibili lesikhombisa wazala uLameki. 26Ngemva kokuzala uLameki uMethusela waphila iminyaka engamakhulu ayisikhombisa lamatshumi aficamibili lambili, njalo elamanye amadodana lamadodakazi.

27Isiyonke, uMethusela waphila okweminyaka engamakhulu aficamunye lamatshumi ayisithupha laficamunye, wasesifa.

28ULameki esephile iminyaka elikhulu lamatshumi aficamibili lambili wazala indodana. 29Wayitha ibizo wathi ngu-Nowa, wathi, “Izasiduduza emsebenzini lasekutshikatshikeni kwethu okubuhlungu ngezandla zethu okubangwa ngumhlabathi uJehova awuthukileyo.” 30Ngemva kokuzalwa kukaNowa uLameki waphila iminyaka engamakhulu amahlanu lamatshumi aficamunye lanhlanu, njalo wayelamanye amadodana lamadodakazi. 31Isiyonke, uLameki waphila iminyaka engamakhulu ayisikhombisa lamatshumi ayisikhombisa, wasesifa.

32Ngemva kokuphila iminyaka engamakhulu amahlanu, uNowa wazala uShemu, loHamu loJafethi.
Copyright information for NdeIBE